Гъатхапэм и 9-м, 2019-рэ илъэсым, Къэрэщай-Черкес Республикэм икъэлашъхьэу Черкесск Адыгэ Республикэм, Къэбэртае-Бэлкъар Республикэм ыкIи Къэрэщай-Черкес Республикэм ащыщ Адыгэ хасэхэр ыкIи Адыэ лъэпкъ Iофлэжьхэр щызэхэхьагъэх. Джащ фэдэу къыщатхы, Къэбэртае-Бэлкъарым щылажьэрэ организациеу "Хабзэ"-м исайты.
Зэхэхьагъэхэм зэдащтагъ Адыгэ лъэпкъ Iофлэжьхэм я Совет (хасэ) зэхащэнэу. Ахэм пшъэрылъ шъхьаIхэу зыфагъэуцужьыгъэхэр:
- Адыгэ Республикэхэм я статус къэухъумэгъэныр ыкIи гъэпытэгъэныр.
- Адыгэ лъэпкъ-гъэкIодыр Урысые Федерацием ыщтэнэу дэлэжьэнхэр.
- Хэку гъэзэжьын Iофым епхыгъэ лъэныкъо пстэуми дэлэжьэнхэр.
- Адыгабзэм изэгъэшIэн, игъэлэжьэн ыкIи ихэгъэхъон дэлэжьэнхэр.
Советым (Хасэм) хэхьагъэхэм къызэраIуагъэмкIэ ахэр мафэ къэс интернетмкIэ зэпхыгъэхэу зэдэлэжьэщтых. Тхьэмафэ къэс интернет зэхэсыгъо ашIыщт ыкIи мазэ къэс зэIукIэ ашIыщт. Ащ нэмыкIэу, Советыр (хасэр) Адыгэ лъэпкъ Iоф шъхьаIхэм яхьылIагъэу програмэ ашIыщт, зэфэшъхьэф хасэхэм ыкIи лъэпкъ Iофлэжьыхэм язэпхыныгъэхэр агъэпытэщт, Iоф къиныгъохэр къызыхъукIэ ахэм зэрапэгъокIыщт шIыкIэхэр агъэпсыщтых ыкIи нэмыкI лъэпкъ Iофхэм адэлэжьэщтых.